Thoughts From Catterline, in Corona Virus Time
By long time supporter of the club Dave Ramsay
Well help ma boab, crivvens crikey jings,
Fit dae ye mak’ o’ this state o’ things,
Staying at hame, and washin’ yir hands,
Ye cannae even gang, fur a walk on the sands.
Noo oor favourite walk, wis doon at St Cyrus,
But ye cannae gang there, because o’ this virus,
There’s nae social distance, when crossing yon bridge,
And that wid be jist, living life on the edge.
A nicht oot at the Anchor, doon in Johnshaven,
Wis ayeways a treat, but look fit wir savin’
Pair Gary and his business, is doon on their knees,
Nae punters tae cook fur, nae diners tae please.
He could set up a food bank, tae help fowk in need,
You kin bet yer top dollar, you’d get a great feed,
As a hotelier ah’m sure he’s ne’er seen the likes,
But it gi’es him and Ronan, mair time on their bikes.
Tae the Clatterin’ Brig for a sandwich and soup,
Even if open, ye’ve the bobbies tae jouk,
And a sandwich and soup, whiles classed as essential,
Man this stayin’ at hame, is driving’ me mental.
Think o’ the pair fowk, doon in Fettercairn,
The young couple in a hoose, wi’ a six month old bairn,
Noo ye micht think it fine, being relaxed and lazy,
But spare them a thoct, they’ll be gaun stir crazy.
At the meenit we’re fine, the freezers are fu’
If worse is tae come, I can aye shoot a doo,
Pigeon pie fur ma tea, am really quite keen,
An awfu’ lot better, than haen Covid 19.
The Creel Inn in Catterline, his hid tae shut doon,
A sad loss tae the locals, and fowks a’ aroon,
A communiy resource of North East renown,
Often hid a “lock in” but nivver a “lockdown”
Spare a thocht fur the new fowk, at the Grassic Gibbon,
A new season, new menu, they’d hoped tae begin,
They’ll be disappointed, jist like all of us,
But we’ll a’ play wir pairt, and beat this virus.
Noo tae pit in the days, while awa’ wir spare time,
We’ve hid guid books, fine food, and a fine glass o’ wine,
Tae Fountainhall Wines, they’re the ones I’ve tae thank,
But my car boot is burstin,’ fur the nearest bottle bank!
Noo if ye think this lighthearted, then let me assure,
We’re following the advice, jist tae mak really sure,
Cos the last thing I want, is fur me and the wife,
Tae come doon wi’ the virus, which is certainly rife.
Noo the reason is selfish, I hae tae confess,
‘Cos tae self isolate, wid cause much distress,
One bedroom, one lavvie, well I’ll leave ye tae guess,
Life here in South Row, could be a richt mess!
I can jist see it noo, as the crisis unfolds,
Panic buying, nae flour, and nae lavvie rolls,
Spikin’ tae each ither, aboot shopping and stores,
Slippin’ slices o’ Spam ‘neath the living room door!
There’s things that I’ve missed, that dinnae matter at a’
But the thing I miss maist, is my Saturday fitba,
We’ll be back there my freends, fan its a’ passed awa’
And maybe look forward, tae summer fitba!
Well I’ve said my piece, and I’ll draw tae a close,
We’re daen athing richt, so that we’re nae exposed,
We’ll a’ get through this, if we dinnae touch wir face,
Tae my freends at this time, keep weel, and keep safe.
© Ramsay, April 2020
